2Ti 1 | MCQ | STEP | Na Poru Godoni ura ijino Jesu Keriso oni apasorua. 'Ene Jesu Keriso oni vaji majama hihuna'e nahama 'warumaji najahi'ina.

2 Timothy 1

Vu'a Anejijihina

1 Na Poru Godoni ura ijino Jesu Keriso oni apasorua. 'Ene Jesu Keriso oni vaji majama hihuna'e nahama 'warumaji najahi'ina. 2 Timoti nuni hariha ka'ene na oja mahuji'i na ona'e veju. Maiji vwihanii'ina 'ee numiravi'ina 'ee matauvi'ina ka'ene Godi Amoho 'ee núni Natohwa Jesu Keriso oni rena roajaho ona.

Timoti Onijihuna'e Teimani 'Wame 'Ee Ni'ajahe Vu'a 'Waramajina

3 Godi ka'ene na Huni kaukara vejujaho areri sahunupo vejaja'ina'e nuni vwiha arira na'eju'e teimani 'wavura. Na majama na'ia veiri'a nuni siporua'e 'ojuri veijino a vwihanaura. 4 Nú no'o rana'aravari veijino oni nitua ka'ene arihajaho na majaa vwihanare'e na a kahuna ura renia paranu. 'Ene vea ka'ene na ka'ujino na niho'o teamanihuna. 5 Na vwihajujaho oni vaji nimairoa ka'ene namujaho ira'ata pana. Ijaho amura oni sasa Roisi oni vaji namana'omo ohuna Unisi oni vaji namu. 'Ene na nimaa rojujaho oni vaja 'u'o namu. 6 'Enajihuna'e na kú'o 'waravujaho vea ka'ene na ija oni haha toi ranavujino Godira swara ka'ene mahajaho ihajihe re'amana. 7 Godira 'Avena ka'ene múhajaho tea junuhuna pamúhana kaivo harura 'ee ea oja mihuna 'ee onúno 'ajoarahuniji múhana. 8 'Enajihuna'e núni Natohwiji rone 'warahunijaho paju'amana. 'Ee nara Hunijihuna'e tipura hijujihuna'e pajuna'amana kaivo roe ja pu'úmo Godira harura ka'ene múhana vajijino ahuma Huni vu'a maiu'ini jihuna'e sisei hija. 9 Núra kaukara mamaa'e vejakame Hu nú ni'ajúhuna pana kaivo ijaho Hura mahuni ura ijino maiji vwihanúarena mai'o mwe'a paveji'ini Jesu Keriso oni vaji nú ni'ajúhana 'ee hia arira akuavi'i hihuna'e iji pijúhana. 10 'Ena'omo Hu iviamaa vejume Huni ura ijaho Jesu Keriso ka'ene núni Ni'ajúhi'inijara roana vajijino samaahiramana. 'Ene Hura kwamasahuni harurijaho tirakui Huni ira maiu'ina vajijino majama hihuna 'ee pakwamasahuna vejume roe samaa'e renana. 11 Ijí 'unama kajihuna kaji na 'waravi'ina 'ee apasorua 'ee najahi'ina re'urono iji pijihana. 12 Ijihuni hahi na 'u'o ike uneunecha kehi punijihuna'e na sisei hijuta kaivo na pajunimu. Ijihuni maijaho na irá nimaa rojujaho na nihena kavu 'ee na nimaa rojujaho Hu nara raka ka'ene Hu ve'amaro mahujaho hu areri 'ajo'eje va'e vea kajaho apehuna. 13 Nara 'unama arira ka'ene a najahuma a nununa'i Jesu Keriso oni vaji nimaa rohuna 'ee oja mihuna hena kamajaho ija kisi 'uninami'amana. 14 'Ene Godoni 'Avena ka'ene núni vaji hinujara ni'aja'eje mamaa ka'ene mahajaho 'ajo'amana. 15 A nihenu ja'ina'e ea maho'o ka'ene Esia hijujija na ranamie va'ara. 'E'eme puni vaji Pijarasi'o Hamajinisi'o va'ara. 16 Natohwijara Onesiporasiho 'ee huni akana ni'ima'ura numira'amana. Ijihuni maijaho na tipurai hijujaho hu paju'ika'i vu'e kikime 'ee ni'ajihi'i hinana. 17 'Enakaivo hu vea ka'ene Romu roajaho hu roe niho'o ni'ima'ura sarimuva'o piunimana. 18 'Ena'omo vea ka'ene Natohwijara ro'amani veijino Natohwijara numihuna. 'Ene hu Epasasi na ichá'ina'e ni'ajihajaho a nihena kamana.